حياتك سكر ... مقدمه زى السكر3

هل فعلا السعاده مؤثر داخلى فقط؟....دا السؤال اللى كنا سألناه فى الجزء التانى من المقدمه بتاعتنا
***خلينا نجاوب السؤال ده من اولو....فى اوائل القرن الماضى مع نشأت علم النفس ابتدى علماء النفس يدرسو الامراض و العقد و المشاكل النفسيه......فلان عندو وسواس قهرى...فلان عندو عصاب....فلان عندو اكتئاب....فلان عندو مراق....فلان عندو رهاب نفسى....هيستريا...البارانويا...الزملة البارانوية....التخشب.......التناذرات الهيبفرينية.......و حجات تانيه كتير.
بس محدش خد بالو ان كل دى عباره عن امراض نفسيه او عقد او مشاكل.....طيب فين السعاده؟
فين التفاؤل؟ فين الأمل ؟ الحجات الجميله دى .....و علشان الحجات الجميله دى ...نشأ فرع مهم جدا جدا من فروع علم النفس اسمو ((علم النفس الايجابى))...و هنا العلماء بدأو يدرسو السعاده دراسه حقيقه فعلا و طلعت ابحاث و دراسات كتير هنتعرف عليها فى خلال المقالات .
بس احنا هنا بنتكلم عن السعاده ....طيب هى ايه السعاده؟ ما هو تعريف السعاده؟
انا طبعا لما قريت بعض تعريفات السعاده....حسيت انى حزين و مكتئب
للأسف الشديد هناك تعريفات معقده جدا عن السعاده.......يعنى مثلا
((السعاده تتكون من مكونين رئيسين هما البهجه و الاستمتاع منصهرين سويا))
((السعاده تتكون من مكونات ثلاثة هى معنى الحياه و المتع و الاندماج فى شىء تحبه))
كلام جميل و علمى ....بس فين السعاده ف كل ده
خلينى أسألك ....هل انت سعيد؟.....ببساطه شديده علشان نخلص من موضوع التعريفات ده
هل ممرت بشعور السعاده قبل ذلك؟ ....اجابتك بنعم هوا دا تعريف السعاده بالنسبالك
لانو زى ما بيقول (دان جيلبريت) ......(السعاد هى كلمه نطلقها على أشياء مختلفه تماما)
انتا بتكون سعيد لما بتشوف ماتش كوره.....حد تانى الكوره بتتعبو نفسيا
انتا بتكون سعيد لما تشوف مسلسل رومانسى من 150حلقه.....حد تانى(زى انا مثلا) شايف ان ده شلل اطفال.
*للأسف الشديد فى السينما و الافلام ...ادونا صوره عنا لشخص السعيد انو لازم يكون ديما مبسوط و بيضحك و ديما مرتاح و معهوش مشاكل اطلاقا.((هوا الشخص دا عايش فى كوكب الأرض؟؟؟))
و دا للأسف كلام غير صحيح اطلاقا........لانو قام احد العلماء بدراسة اناس سعداء و راضين عن حياتهم و اكتشو حاجه ريبه جدا بعد الدراسه دى....اكتشفو ان السعداء بيمرو بنفس عدد المشاعر السلبيه اللى بيمر بيها الشخص التعيس الحزين.....تخيل؟ .....طيب ايه الفرق بينهم
الفرق بينهم ان السعداء بيرتاحو بسرعه بعد اى شعور سلبى....عندهم مناعه نفسيه....اما التعساء و المتنكدين بيفضلو يندبو حظهم .....هوا دا الفرق.....تخيل!!!!
و علشان كده ف خلال مجموعة المقالات دى اللى بعنوان ((حياتك سكر)) هتتعرف على ...ازاى تبقى سعيد فعلا.....ايه الحجات اللى بتؤثر على سعادتك.....ازاى تعمل مناعه نفسيه و تبقى سعيد.....و حجات تانيه كتير جدا ....هنتعرف عليها مع بعض فى ((حياتك سكر))
***قوانين مقالات ((حياتك سكر)) : و زى ما بيقول المثل المصرى ((اللى اولو شرط اخرو نور))
و علشان كده خلينا نتفق على كام حاجه فى الاول ....علشان ندخل للمقالات بكل ارتياح.....اتفقنا؟
أولا : انا موعدكش انى اعلمك حجات جديده : يعنى لو انتا شخص دارس علم نفس عموما او علم النفس الايجابى خصوصا ....هتلاقى ان اغلب المعلومات اللى بقولها انتا تعرفها.....لانها موجوده فى كتب شريف عرفه و مارتن سليجمان و غيرهم.....بس اللى اوعدك بيه....ان كلامى هيوصل لقلبك لانو من قلبى فعلا.....لانى و الله بجد نفسى حياتك تبقى سكر بجد .
ثانيا : كفايه كلام : اكيد اغلبنا قرأ عن السعاده كتير....بس الفرق اللى ف مقالات (حياتك سكر) هوا انو مش مجرد كلام .....لانى ف اخر كل مقال هتلاقينى بقولك حجات عمليه للسعاده.....لو عايز السعاده فعلا اعملها....لو مش عاوز يبقى وفر وقتك و البس اسود و اقعد اندب حظك احسن.
ثالثا : سكر؟ : الكلمه دى هتلاقيها بتكرر كتير شويه فى المقالات ....لانى بينى و بين اصدقائى المقربين ....بشيل كلمات زى (حاضر . ماشى . اتفقنا. اوكى . وعد . تمام......) و بحط مكانها (سكر؟)يقولى (سكر) علشان كده ....نوعا من التواصل بينا و بين بعض هتلاقينى بقولك (سكر؟) تروح انتا قايل الشفره اللى بينا ...اللى هيا (سكر)......اتفهمت النقطه دى ....سكر؟ ها قول (سكر) فى سرك
رابعا : كل بنى ادم خطاا : انا انسان و اكيد هغلط ...و بصراحه بقى مش هسامحك لو لقيتنى غلطت ف حاجه و مصححتليش......سكر؟........انا هعتبر انك قولت سكر.
خامسا : يا رب حياتك و حياة اللى بتحبهم تبقى كلها سكر فى سكر و سعاده فى سعاده
و دوما من افضل الى افضل.............اللهم امين.........اهو انا بدعيلك اهوه ...يبقى طلبى هوا انك كمان تدعيلى من قلبك لانى فعلا محتاج لدعواتك.
و بكده يبقى اتنهت (مقدمة سلسلة حياتك سكر) و ان شاء الله نتقابل قريب جدا جدا
فى مقال جديد ......و لحد ما نتقابل........استودعك فى امان الله و حفظه .