حياتك سكر ... مقدمه زى السكر2

***القصه بتبتدى بدايه عاديه جدا.....اتنين اصدقاء قاعدين مع بعض بيصطادوا سمك ....الاولنى اصطاد سمكه كبيره راح لم الادوات بتاعتو و قال خلاص انا ماشى...راح صاحبو التانى قالو ليه ما تكمل صيد....راح قالو اكمل صيد ليه؟....قالو علشان تجمع سمك كتير.....قالو ليه؟...قالو علشان تقدر تبيعو....قالو ابيعو ليه.....قالو علشان الناس تعرفك بتبيع سمك و يبقى معاك محل سمك.....قالو يبقى معايا محل سمك ليه؟.....قالو علشان تبقى غنى.....قالو ابقى غنى ليه.....قالو علشان تقدر تتجوز و تفتح بيت....قالو اتجوز و افتح بيت ليه.....قالو علشان تخلف اولاد و هما يخلفو اولاد و تبقى جد.....قالو كل دا ليه....قالو علشان تبقى سعيد.....قالو ما انا سعيد دلوقتى من غير كل ده.
*فى ناس كتير جدا علشان توصل للسعاده بتعمل حجات كتييييييييييير مع انو ممكن انك توصل للسعاده من الطريق المختصر البسيط. .
*باعتبارى دارس للتنميه البشريه...ناس كتير جدا بتسألنى عن السعاده.....ازاى ابقى سعيد؟ ازاى ابقى سعيده؟...انا دلوقتى ليه مش سعيد؟ ليه فلان و فلانه سعداء و انا لاء؟ .........الخ
و انا كمان كنت بسأل نفسى الاسئله دى ..... و كانت عندى عقيده شبه راسخه ان السعاده حاجه داخليه و بس و دا الكلام اللى بيقولوه مدربين التنميه البشريه.....لحد ما مريت بمشكله معينه
و خرجت منها بفضل الله.....لقيت انى اتغيرت نظرتى لقوانين كتير جدا فى الحياه.....و لحجات كتير قرتها.....و عرفت قوانين اكتر عن السعاده ...السعاده الحقيقه اللى فعلا تحسها....مش مجرد ان الكاتب اللى بتقرالو يعيشك ف دنيا تانيه و ان الدنيا جميله و ان الناس كلها طيبه و ان الجاوز متوفر و ان المرتبات مرتفعه و ان اللحمه ببلاش و ان الشقق رخيصه و ........الح و بعد ما تخلص الكلام ده تتصدم بالواقع .
***مدربين التنميه البشريه و غيرهم ...مشكلتهم انهم لما يتكلمو عن السعاده بيحسسك انك كمبوتر او ان السعاده دى بضغطة زر واحده .....عمرى ما هنسى انو احد محاضرين التنميه البشريه
كان بيتكلم عن الثقه بالنفس .....و ف الاخر بيقول ...خطوات تحقيق الثقه بالنفس
الخطوه الاولى : كن سعيدا.........يااا راااااااااااااجل بتتكلم بجد ؟ ابقى سعيد؟
الخطوة الثانيه : حب نفسك ..... وااااااااو لا كدا انا اقتنعت ....يعنى ابقى سعيد و احب نفسى
دا على اساس انى هدوس على زرار هبقى سعيد و بعدين هلاقى نفسى بحب نفسى و ببوسها و بطلبها من اهلها.........يا جماعه عاوزين كلام واقعى ....عاوزين كلام يتطبق.....عاوزين كلام علمى.
***و علشان كدا بقين أسأل نفسى ...هل فعلا القوانين اللى اعرفها عن السعاده كلها صح؟
هل فعلا ان السعاده شىء داخلى ملهوش اى علاقه بالمؤثرات الخارجيه؟
طيب انا ليه لما انجح ببقى سعيد؟ ... ليه لما اكسب فلوس _مثلا_ ببقى سعيد؟
ليه لما اسمع خبر كويس ابقى سعيد؟ هيا مش كل دى مؤثرات بتخلينى سعيد او حزين؟
هل فعلا الكلام دا دقيق و علمى؟
لو عايز تعرف ...او لو مش عاوز تعرف.........يبقى يلا مع بعض نكمل فى المقال اللى جاى