لا تكن سعيدا و لكن كن ((.........))

اها ...على فكره انتا قريت عنوان المقال صح
لا تكن سعيدا و لكن كن ((.....))
العنوان فى شىء من الغموض ...و هيتضح دلوقتى حالا
بس خلى بالك انتا بتقرى مقال عن السعاده....فابسم و صلى على النبى و يلا بينا ندخل على المقال مع بعض .
* عم (بائع السعاده) زى كل يوم الصبح ...شال الالعاب على كتفو و لف بيها فى الشوارع و كان سعيد جدا جدا و هوا بيدى الاطفال العاب لانو بيلاقى الابتسامه على وشوشهم...و ف خلال ما هوا كده و شغال بينادى ((العاب..عرايس ..دباديب....ببلاش لكل الاطفال))...جاتلو بنوته صغنونه زى القمر و قربتلو و قالتلو بصوت هادى جدا ((صباح الخير)) و قالتلو ((الدبدوب دا بكام)) و شاورتلو على دبدوب صغنون جدا
و عمنا (بائع السعاده) باصص عليها فى كل ذهول و مش عارف يعمل ايه ...راحت كررت السؤال مره و التانيه....راح شاورها باديو انو مجانا ببلاش.....راحت قالتلو ( عمو..انتا مش بتتكلم؟؟؟) راح قالها لا لا انا بتكلم.....انتى عاوزه الدبدوب دا لمين؟ راحت طلعت من شنطتها دفتر بسيط و فتحتو و قدمتهولو و كان فيه ورده قالتلو انا عاوزه الدبدوب ده للشخص اللى ادانى الورده ....راح قالها بس المفروض اللى ادالك ورده تديلو ورده....راحت زعلت وبصت فى الارض و وشها احمر جدا و قالتلو طيب يا عمو كلمحلات الورد قافله و انتا مش بتبيع الورد......راح ادلها الدبدوب ...راحت بصتلو و قالتلو (لا...انا هادى صاحب الورده..ورده زيها)) و مشيت و ركبت اتوبيس المدرسه...و فعلا فكر عم (بائع السعاده) انو يجبلها ورده و فعلا استنى محل الورد لحد ما فتح و اشترى منو ورده و استنى البنت دى لحد ما تيجى من المدرسه و يديهالها....و فعلا رجعت اتوبيسات المدارس....و خرج منها كل الطلاب ما عدا هى.....راح فكر و زعل و قعد يسأل نفسو يا ترى هيا فين؟....و ف خلال ما هوا قاعد ...لمح على الجانب التانى من الشارع البنوته اللى كان بيدور عليها.....راح شاورها خليكى مكانك انا جايلك ...و راحلها بسرعه شديده
و بسبب الفرحه الفظيعه اللى كانت مسيطره عليه....جرى عم(بائع السعاده) علشان يلحق يدى الورده للبنوته علشان تديها لصاحب الورده.....و ف خلال ما هوا بيجرى ...الدنيا كلها سمعت اصوات الفرامل و المنبهات و الكلاكسات.....و بعد خمس دقايق هدى الصوت
و الناس ساكته و مندهشه.....و على الاسفلت....ورده و شوية العاب...و (جثة بائع السعاده)
**********************مات بائع السعاده****************************
بس لسه فى ناس كتير تانيه بتبيع السعاده
خلينى اعرفك ببائع السعاده اللى انا اعرفو بشكل شخصى....بائع السعاده اللى انا اعرفو
كان هوا الشخص الوحيد اللى استحملنى فى فترة هى من اصعب فترة عمرى
بائع السعاده كان ديما بيرسل الى برسائل ايجابيه
بائع السعاده كان على طول يحاول يكون سببا فى ابتسامتى
و استمر معايا بائع السعاده لحد ما عديت من المشكله....ربنا يجازيه عنى كل خير
بائع السعاده هوا الشخص الوحيد اللى مش عارف اشكرو ازاى....و بجد انا بكتب المقال ده ليه هوا
يمكن يكون شىء بسيط اوفى بيه جزء بسيط من حقو عليا.
**فى ناس كتير بتبيع السعاده......هل انتا واحد منهم؟ هل عايز تبقى واحد منهم؟
1/ تبسمك فى وجه اخيك صدقه
2/ الكلمه الطيبه صدقه
3/اسأل عن الغائبين و اطمن عليهم
4/ حاول تكون سبب فى بسمة حزين ....تفريج هم مهموم.
5/ و حجات تانيه كتير....هيا بسيطه جدا...بس متتخيلش كبيره قد ايه فى نفوس الناس اللى هتعم معاهم كده.
*شكرى الجزيل لكن من قرأ مقالى.....و تحيه خاصة جدا جدا لكل من قرر ان يكون بائع السعاده.