للناجحين فقط....فقط

مدام انتا قريت عنوان المقاله و بردو دخلت يبقى انا هفترض انك من الناجحين
و بصراحه :مش عارف اقولك ايه ، شكرا لانك بتقرى المقالة ديه ، احتمال


تحس انها غريبة عليك شوية وطريقتها مش مفهومة وده ممكن


يخليك مهتم انك تكملها للاخر علشان الواحد بيحب دايما كل حاجة


غريبة وجديدة .. انا مش هقولك المرة ديه انك تركز مع كل كلمة


لان فيها حياتك او تصدق كل حاجة هقولهالك من غير ماتفكر ،


ومش عارف رد فعلك هيكون ايه ؟ هل هتبدأ تقيم كل حاجة في


حياتك ؟ ولا هتبدأ تاخد موقف تجاه كل حاجة بتعطلك ؟ ولا هتعمل


كل الي تقدر عليه علشان بجد تنجح ؟ وامتى ؟ دلوقتي حالا ولا


لما تخلص المقالة ولا لما تصحى بكرة ان شاء الله ولا لما تقابل حد


معين او تسمع صوت حد معين ؟ انا مش بدعي اني عارف


بالعكس انا مش عارف بس عارف انك عارف ولو مش عارف فان


ا عارف ان فيه حد جواك عارف زي مانا عرفت اني عارف..
.


حاول تقاوم رغبتك في انك تنجح وتتغير ، كتير مننا حاولوا


واستمروا بس في النهاية كان كلنا بنفشل في المحاولة ، والطبيعي


ان اي حاجة هتحاول تعملها مش هتقدر تعملها الا لو قررت انك


تعملها ، الي بطل تدخين ده حد قرر والي نجح ده واحد قرر والي


اتغير ده برضه واحد قرر ، الي فشل ده حد حاول والي سقط


والي تاه والي اكتئب كلهم ناس حاولوا محدش فيهم قرر ،


المحاولة ممكن تاخد منك سنين اما القرار فدايما بياخد ثواني مش اكتر..


في بعض الاوقات هتبص على حياتك وتنسى تفاصيلها وتفتكر


اكتر التجارب الي اثرت عليك ، هتلاقي نفسك عايز ترجع تغيرها


ممكن فعلا انك ترجع تغيرها ، ساعات فيه ناس بتقدر ، ومدام


الواحد بيقدر فده معناه انك انت كمان تقدر تغيرها ، صح ولا لا؟


بس هل انت مضطر ترجع ؟ الواحد مش مضطر انه يرجع الا لما


يقرر انه يرجع .. وده امتى ؟ لما يقرى ، لما يفهم ولما يتعلم ..


انت بتعمل ايه دلوقتي؟ غير انك بتقرى ؟ بتفكر في مين ؟ في ايه ؟


بتفكر في ازاي وليه ؟ خليك هادي ومش ضروري انك تهدى اوي


وبسرعة بس على الاقل لما تفهم هتهدى ، كلنا لما بنفهم بنهدى ،


وانت فاهم ، ان الفهم لوحده مش كفاية ، لازم تتعلم ..


في خلال مانت بتقرى وانت بتتعلم بجدية خليني احكيلك حدودتة ،


حد كان بيحكيلك حدودة ؟ فاكر زمان ؟ ممكن وممكن لا ، بس


الموضوع مش ممسوك من النص ، ديه فزورة حلها صعب زي ،


لو سالت نفسك ايه هيا الحاجة الخفيفة اوي واقوى الناس ميقدرش


يمسكها اكتر من دقيقة ... ناس ممكن تعرفها في ثواني وناس


ممكن تتعب علشان توصلها ، ولما تتعب هتكتشف انها بتمسك


نفسها ومبتقدرش تمسكه اكتر من دقيقة ، شوفت الواحد بيتعلم


ازاي ؟ شوفت الواحد ممكن يتعلم من ايه ؟ من الي بيحصله دايما


، ويحل كل مشاكله ويحقق كل احلامه ، ممكن تكون كبير دلوقتي


او حتى لو صغير برضه ضاع من عمرك وقت معرفتش فيه تحل


الفزورة ، حلها وفكها هتلاقيك عرفت معناها ، بسهولة وبيسر


هتوصل للحل ، مش محتاج انك تركز ، بس محتاج انك تفهم


وتتعلم اكتر واكتر ... انت بتتكلم عربي وبتفهم عربي وبتلبس الي


انت عايزه علشان تنزل او تقعد في البيت ، وتقدر تتعلم تتغير


بسبب ان العربي بالنسبة لك من فترة كان صعب ولفترة مكنتش


بتعرف تلبس لوحدك ولفترة برضه مكنش ينفع تخرج لوحدك بس


دلوقتي كل حاجة سهلة ، كل حاجة ممكن وبتحصل وعلى راي


المثل الواحد مبيتعلمش ببلاش ، لو موافق على كلامي هتلاقي


نفسك مسكت نفسك لثانيتين في خلال مانت بتقرى او عينك


هترمش قبل ماخلص الكلمة .. علشان كده دلوقتي وانت بتتغير


خلي بالك من انك مش محتاج تتغير في كل حاجة ، ركز الاول


على تنفسك و على اتجاه افكارك ، حالتك هتتغير وهتتعلم اكتر واكتر ..


كان اسمه ... مش مهم .. كان صغير او كبير .. مش مهم ... اصنع


انت تفاصيلك المهم انه وقع على حاجة غيرت حياته ، فكر كتير


فيها وهو صاحي وهو نايم واكتشف انها بقت تجري وراه وتحاومه


، وقف وقال انا موافق ، ولما وافق بس ، الدنيا جاتله في الاول


كان عايز ومحتاج ، والدنيا مبتجيش لحد محتاج ، الدنيا بتيجي للي


موافق ، ولما وافق جاتلها راكعة ، في اللحظة الي هتوافق فيها


وتغمض عينك ، هتفتحها تاني وهتلاقيها راكعة قدامك.....و راسلنى
***مقال تحفيزى.......شاكر جدا لكل اللى قرو مقالى للاخر
و هما دول فعلا اللى بيحفزونى الى الامام .....بشكرهم من كل قلبى
و علشانهم و بس بكتب المقالات دى.
تحياتى..........فارس السنه