مقال برىء .....التنويم الأسود

من طرف **fares_al_sonaa20** الخميس ديسمبر 29, 2011 12:48 am

مهم جدا : فكر في فكرة ايجابية ، احساس عايز تحس بيه او هدف عايز تحققه او سلوك عايز تتبناه قبل ماتقرى المقالة علشان مع انتهاء المقالة هتوصل للي كنت بتفكر فيه فصدقني من مصلحتك يكون شىء ايجابي او متكملش قراية

مش عارف اكتب حاجة ، بس حاسس بفكرة مهمة جدا وشاغلة تركيزي ومحتاج اتكلم عنها ، اسمها – اعمل حاجة .

يمكن علشان مش عارف اكتب حاجة واني فعلا بعمل حاجة فده بيخليني اكمل كتابة ، ومجرد اني بفكر انا المفروض اكتب ايه وانا بكتب ده بيخليني اكمل كتابة ومجرد انك بتحاول دلوقتي انك تربط كلامي ببعضه فده بيخليك تقرى الحرف الي جاي وتحس ان قدرتك الاستيعابية بتتقل ويمكن عينك بتنط على الكلام لمجرد انك بتتوجه دلوقتي ومش واخد بالك من الفكرة الرئيسية ممكن تكون ايه .

يمكن تفكر انك تكمل قراية او تفكر انك تقفل المقال ، او انك تقول انك مش فاهم حاجة او انك اتخنقت ، بس ومع ذلك انت بتكمل قراية والدليل على ده انك بتقرى لحد دلوقتي .

تقدر تقفل دلوقتي بس لو قفلت هتبقى حاسس ان فيه حاجة ناقصة لانك دخلت جوا مجموعة مترابطة من الافكار الي لو حتى قفلت دلوقتي هتكتشف انها لسة في دماغك وعقلك هيرجعك لنفس المقالة ديه ويفكرك بيها سواء ادركت ده او مادركتهوش .

من الجميل انك تكون بتعمل حاجة انت مكنتش متخيل انك تعملها وهيا عملية القراية ، لو فكرت زمان هتكتشف انها كانت الغاز بالنسبة لك لكن دلوقتي انت تقدر تقرى وتكمل وتحس وكان الحروف بتحسسك بقوة عقلك على تكملة حاجة بمنتهى البراعة من غير ماتفكر في درس اللغة العربية علشان تحدد الكلمة ديه معناها ايه او بتتقري ازاي .

العجيب يمكن مبتكونش بتفكر كده وتكون بتقرى بتلقائية زي مانت شايف وحاسس بس عقلك فعلا مع كل حرف عنيك بتقع عليه بيبدأ يستعيد ذكريات كتير جدا من جواك ، علشان تفهم الكلمة ، وكل ده بيحصل ف جزء من الثانية من غير ماتركز ومن غير ماتعرف انه بيحصل لانها بقت عملية لاواعية عقلك اللاواعي بيقوم بيها طول الوقت .

يمكن شكل حرف اللام يكون بيفكرك بتدويرة صباع المدرسة علشان تقربلكم الشكل وتحفظوه بسرعة ، بس العجيب انك لو صدقت الكلام الي بقولهولك هتكتشف ان قرايتك سرعتها بتقل وكانك بتقرى كلمة كلمة ، ولو حطيت في دماغك ان ده مبيحصلش هتلاقي نفسك بتركز على كل كلمة مع انك مش مصدق بس طول مانت بتقول ان ده مش حقيقي فانت هتركز عليه هتكتشف انه بيحصل وده لان عقلك هيبدأ يعمل عملية لاواعية بشكل واعي وهتؤدي ف النهاية انه يخليك بطىء الاستيعاب وسريع التاثر ، فلو انت لسة بتقرى دلوقتي جرب تقرى المقالة تاني بصوت عالي وتعالى عند الجزء ده وهتكتشف انك لإيما بتعلي صوتك هنا علشان تثبت ان الموضوع عادي معاك او تحاول تسرع قرايتك علشان تثبت انك متاثرتش او تلاقي نفسك بتتك على الكلام الي بتقوله وفي الاخر انت بتتاثر بالي انت مش عايز تتاثر بيه !!

لو لسة بتكمل تبقى واخدها تحدي ، ولو واخدها تحدي فهيا وخداك عن حب ، والحب في القلب والقلب ف الجسم والجسم على كرسي دلوقتي بيقرى الكلام المكتوب بيخليك تفكر النهاردة في حد ممكن متكونش فاكره او يمكن تكون نسيته ، ممكن تقول اسمه دلوقتي او يمكن تحلم بيه المرة الجاي الي هتقفل فيها عينك هتشوفه قدامك ، ممكن تفتكره وممكن متاخدش بالك وتعدي من جمبه وكانه مكانش.

ولو حاولت انك تفتكر الي انت قريته هتحس كانه وهم مش كامل ولا ناقص بس مهم بالنسبة لك ، وديه حاجة كويسة وانت عارف كده ولا لسة ؟

ويمكن تسرح ويمكن تحاول تعيد قراية كام جملة علشان توصل لمعنى ساعتها هتعرف معنى ان الانسان يقدر يتميز في حاجات في منتهى الروعة ويوصل لمشاعر جميلة بسرعة هايلة في اقرب فرصة تتاح ليه هيستغلها ويشتغل عليها .

وعقلك لاواعي دلوقتي او واعي باللاواعي فده بيخليك واعي باي حاجة غير واعية عقلك بيوعيك بيها ، زي انك هتركز مع كل حاجة هقولهالك دلوقتي فمثلا ضربات قلبك ممكن تكون بتزيد او تنقص وعلشان انا قولتلك ضربات قلبك فده هيخليك تركز على ضربات قلبك ولو لجزء من الثانية ، ولو مش مصدق ان عقلك اللاواعي مش بيستقبل اقتراحاتي فحاول على اد ماتقدر انك متركزش على رجلك دلوقتي وتحس فيها انها ثابته ف مكانه ، عارفة يعني ايه ثبات الرجل؟ طيب حاول متركزش على تنفسك هتلاقي نفسك لو معارضني بقوة ممكن تكتم نفسك ولو موافقني ومتحمس هتلاقي تنفسك طبيعي واحسن ومستريح ، ومجرد انك تركز على فكرة التنفس جرب متاخدش بالك من زفيرك هتلاقي عقلك اللاواعي بيوجه تركيزك ليه . ودلوقتي خد نفس عميق … خدته ؟ لو خدته فده كويس ولو مخدتوش فانت كده كده بتتنفس بس هتلاقي نفس طول شوية عن اخواته وحاول انك متتنفسش بعمق دلوقتي علشان تكتشف ان ده بيحصل كل مرة تحاول تنساه .

الوقت بيعدي وبيطول قدامك وبتبدأ تحس انك جزئيا وكليا جزء من عملية لاواعية بتحصلك لمجرد انك بتستخدم عينك وتقرى السطور ديه ، بمناسبة العين ، مخدتش بالك ان عينك ثبتت لفترات وانت بتقرى ؟ مش ده المهم ، مخدتش بالك دلوقتي انك لما حاولت تاخد بالك من ثبات عينك ، عينك رمشت !

ولانك جزء من عملية عقلية ، فاعرف ان اي حاجة هتفكر فيها ف خلال ال 5 دقايق الجاية هتبقى جزء حقيقي من واقعك هتبدأ تحس بيه اول ماتخلص قراية المقالة او يمكن اول ماتنام وتصحى او ف خلال الاسبوع الجاي هتحس بالتغيير ، ديه حاجة ترجعلك ، وده شىء يهمك اختار اي حاجة من التلاتة او خلي اللاواعي هو الي يختار بنفسه .

ودلوقتي غمض عينك …واعرف ان عقلك بيرجع بكامل قوته المنطقية الواعية وخد نفس عميق ....و خلينى أقول لحضرتك هوا ايه اللى حصل.........اللى حصل ببساطه ان دى مقاله مكتوبه بأسلوب معين و تم استخدام انماط لغويه معينه و تقنيات نفسيه معينه......بردو ...هوا ايه اللى حصل....اللى حصل ان الطريقه الل اتكتب بيها المقال ده تندرج تحت علم اسمو ((التنويم الأسود)) اللى من خلالو بتقدر تقنع اى شخصيه باى فكره تحت اى ظروف......بردو.....هوا ايه اللى حصل؟!!!! المره دى مش هقول ايه اللى حصل.....و عاوز اعرف من اللى قرى المقال .....هوا ايه اللى حصل.....و لما اعرف ...هوا ايه اللى حصل......ساعتها هوضح فكرة او علم ((التنويم الأسود))ده.........ها .....هوا ايه اللى حصل؟!!!!!

السلام عليكم ورحمه الله وبركاته

واضح اننا عوزين حد تانى خالص يقلنا ايه اللى حصل !!!

ولكن حبيت اعلق على جزء من كلام حضرتك

ولو حاولت انك تفتكر الي انت قريته هتحس كانه وهم مش كامل ولا ناقص بس مهم بالنسبة لك ، وديه حاجة كويسة وانت عارف كده ولا لسة ؟

دة صحيح ولكن تفسيرة ممكن لطول الموضوع او لان الموضوع يملائه الغموض
فممكن يكون دة تفسير جمله حضرتك

اما بالنسبه لايه اللى حصل ؟

ماوصل لى من اخر المقال كما ذكر بالمقال انها طريقه من خللها يمكن اقناع اى شخص باى فكرة

وفعلا لو ربطنا اول المقاله باخرها هنحس ان الامور وضحت وان ماكان فى غموض من البدايه ولا شئ

جزاكم الله كل الخير وفى انتظار اتمام الموضوع

مقال برىء .....التنويم الأسود

مقال برىء .....التنويم الأسود

رد: مقال برىء .....التنويم الأسود