تحليل شخصيتك من نوع فاكهتك ((مقاله fares_al_sonaa))

فى حاجه غريبه جدا هتكتشفها عن نفسك بس فى اخر المقال و بشرط انك تقرى اول المقال علشان تقدر تفهم اخرو
طبعااااا....الشخصيه سر فعلا لحد دلوقتى الاطباء النفسيين بيحاولوا يعرفو ((أ ب )) عن السر ده
و علشان نعرف ايه السر ده لازم نكون عارفين ان تحليل الشخصيه بيتكون من ركنين أساسيين :
الاول : بناء الشخصيه و فيها بنعرف تعريف الشخصيه و الشخصيه و علاقتها بالخلق و المزاج و الذكاء
و كمان بنعرف السمات الاوليه و السمات الشعوريه و اللاشعوريه و بنعرف حجات كتير مش وقتها دلوقتى.
ثانيا :و دا المهم ....الحكم على الشخصيه : ازاى نحكم على الشخصيه و بنعرف طرق للحكم على الشخصيه زى طريقة او نظرية التداعى الحر و المقابله و الاستخبار و الطرق الاسقاطيه و فى اختبارات تانيه زى اختبار رورشاخ و اختبار الاصوات الخافته و اختبار تداعى المعانى .....الخ الخ
المهم بقى ف الموضوع .......تحليل الشخصيه عن طريق الفاكهه المفضله و كلنا عارفين ان الفاكهه ليها علاقه وثيقه بالشخصيه و بنائها و دا سر انك تلاقى واحد _مثلا_مش بيحب المانجو __زيى انا مثلا_و لو عملتلو ايه ميكلهاش
طيب ايه السر؟ السر هوا اللى هتعرفو بعد ما تعمل اختبار تحليل الشخصيه عن طريق الفاكهه المفضله
خلال نص دقيقه ...عاوزك تختارأكتر فاكهه من الفواكهه اللى جايه تكون بتحبها
س1 : طيب لو بحب فاكهتين مش فاكهه واحده ؟ اختار الاولى ((أتفقنا؟))
جاهز ؟ يلا بينا بسرعه
الموز
البطيخ
الفراوله
العنب
البرتقال
التفاح
اخترت الفاكهه المفضله بالنسبه ليك؟.....يلا بقى نعرف شخصيتك ((و ربنا يستر))
*****************************
لو اخترت الموز دا يدل انك شخصيه بتحب الموز
اما بقى لو اخترت البطيخ دا بيدل انك شخصيه بتحب البطيخ
و لو اخترت الفراوله دا بيدل انك شخصيه بتحب الفراوله
و لو اخترت العنب دا بيدل انك شخصيه بتحب العنب
و لو اخترت البرتقال يبقى انتا شخصيه بتحب البرتقال
واخيرا لو اخترت التفاح يبقى انتا شخصيه بتحب التفاح
انا عارف انك بعضكم بيبتسم و بعضكم متغاظ و بعضكم بيضحك و بعضكم فى ذهول
بس خلونى اقولكم ايه سر كتابتى للمقال ده و ساعتها هتعذرونى
انا كتبت المقال ده لما لقيت واحد كاتب مقال بعنوان((تحليل شخصيتك من فاكهتك))و لقيتو كلام فارع بجد و يتناقض من أبجديات التحليل النفسى بكل مدارسه
و علشان انا درست علم النفس التحليلى و بحبو جدا دا بيخلينى اقولكم _بكل بساطه_ان فكرة تحليل الشخصيه بالفاكهه المفضله او الحيوان المفضله او الشبشب المفضل((بصباع و لا عادى))و بالكيبورد المفضل و الماوس المفضل.......دا كلو كلام فارغ ملهوش اى علاقه بعلم النفس التحليلى من قريب او بعيد
أرجو ان عذرى يكون اتعرف .....و مستنى ردود فعل حضرتكم على المقال حتى و لو بالمعارضه.
حياتى قبل تحياتى
fares_al_sonaa20